torsdag 31. desember 2009

Siste fullmånen

Eg har verken utstyr eller kompetanse til å klare å ta eit godt nok bilete av fullmånen som heng over Fjærvollfjellet no. Det er heilt blått ute, og denne lysande kula er trillrund i dag. Yr melder godver resten av dagen, lammelåret sprer godlukt i heile huset, raudvinen smakar og veden gir varme. 

Dette er ein fin siste dag i eit gammalt år.


onsdag 30. desember 2009

Krokanis

Begynn med å lage krokan. Prøv for eksempel Viestad sin variant av persisk krokan:

2 dl sukker
3 ss smør
2 ss honning
50 g skålda mandlar
50 g pistasjnøtter
50 g hasselnøtter
30 g sesamfrø
1/2 ts kardemomme
1 ts ingefær, tørka
1/2 ts chilipulver eller cayennepepper

Ha smør, sukker og honning i ei panne. Eg fekk ei finfin tjukkbotna traktørpanne med teflonbelegg til jul, og den viser seg å vere perfekt til slik brukt. Smelt til det blir lysebrun karamell på medium varme. Dette er ei av stundene då du skal ha tolmod på kjøkkenet. Ikkje set opp varmen sjølv om det skjer lite og sakte, for plutseleg blir det veldig varmt, og då svir deg seg før du rekk å seie ka-ra-mell. Ikkje rør, men rist litt i panna, så det ikkje festar seg i botnen.  Det heile tar om lag ti minutt. Ver forsiktig - dette blir veldig varmt! Ha i krydder, bland. Grovhakk nøttene, ha dei og bland. La det småsteike i 3-4 minutt. Rør inn sesamfrø. Tresleiv eller silikonslikkepott som toler høg varme, er eigna reiskap. Legg eit flak med bakepapir på kjøkkenbenken, og smør krokanen utover så tynt du klarer. Avkjøl.

Lag vaniljeis. Denne enkle parfaiten blir god med krokanbitar i, denne laga på eggekrem blir rein luksus. Knus krokanen til småbitar, med eit kjevle eller i ein kjøkkenmaskin, og ha den i til sist medan ismaskina rører.

Eg reduserte til 1 dl sukker. Eg hadde i meir mandlar og mindre pistasjnøtter, og så var eg jammen meg fri for sesamfrø, så det vart ikkje med i det heile tatt. Eg var nok i meste laget forsiktig - det hadde gått fint å bruke meir sukker - og krydder, og eg kunne ha laga karamellen endå litt mørkare... Men eg gjorde ein vri og hadde 2 ts Nescafé (utrørt i litt kokande vatn) i vaniljeparfaiten, og då vart det ein veldig god kaffekrokanis til slutt.

Velbekomme!



tysdag 29. desember 2009

Røkt torsk


Lei av julemat? Spis fisk!

Det er ein skjebnens ironi at ein tyr til å kjøpe fisk av Øksnesbilen når ein er i Bø. Fersk fisk er ikkje så lett å få tak i som ein skulle tru - ein må helst kjenne nokon, eller ha båt... (Min generasjon er kanskje til og med villige til å betale for god fisk? Versågod: gratis forretningsidé!) Men å betale litt for behandla fisk, røkt for eksempel, er i grunnen ikkje noko å klage over.

Lengre sør i landet, et de visst mengder av røkt kolje (i.e. hyse). Her nord har eg ikkje inntrykk av at røkt kvitfisk er så vanleg, men det er verkeleg godt. Og veldig enkelt:

Skyll av fisken i kaldvatn, og trekk (ikkje kok, trekk) fisken på samme vis som ferskfisk eller saltfisk. Lag eggesmør og gulrotstuing, og server med kokt potet og flatbrød. Nam!


måndag 28. desember 2009

Enkel vaniljeparfait


Iskrem laga av eggekrem er veldig - veldig! - godt. Men det tar tid. Skal du tilsetje annan smak til isen, er det ikkje riktig nødvendig å lage så mykje styr, så her kjem ei enkel grunnoppskrift på vaniljeparfait:

3 eggeplommar
1-3 ss sukker
1 pk fløyte

Visp eggedosis av egg og sukker/vaniljesukker (mengde etter smak). Visp fløyten stiv. Bland eggedosis og krem - voila! Til denne grunnoppskrifta kan du tilsetje kva smak du vil - bær, sjokolade, nøtter - kva som helst. Til nyttårsaften har eg laga ein variant med hakka sjokoladebitar i, og eg trur det blir ein vri med molte også.



Det beste av alt er at denne oppskrifta er godt eigna til å lage is utan ismaskin. Frys i mindre porsjonsformer, så slepp du til og med å røre.

Velbekomme!

søndag 27. desember 2009

Lag vaniljesukker!


Skyll vaniljestanga etter bruk, og legg den til tørk. Du kan enten leggje stanga rett oppi eit glas og helle sukker over. Lukk glaset, og la det stå nokre uker til sukkeret tar smak og aroma frå vaniljestanga. Eller så kan du dele stanga i litt mindre bitar og kjøre den saman med stavmiksaren saman med sukker. Ha det på eit glas og la det stå nokre dagar. Så siler du vekk dei store bitane av vaniljestanga, og har vaniljesukkeret tilbake på glaset. Litt meir arbeid enn den første varianten, men endå meir utbytte av vaniljen.

Prøv! Har du prøvd heimlaga vaniljesukker, så får du aldri meir lyst å bruke syntetisk vaniljesukker igjen...




Vaniljeis

2,5 dl fløyte
2,5 dl H-mjølk
1 vaniljestang
5 eggeplommar
100 g sukker

Del vaniljestanga på langs, skrap ut frøa og ha det i ein kjele med mjølk og fløyte - ta med vaniljestanga også. Kok opp blandinga. Set til side. Visp saman egg og sukker, det treng ikkje bli heilt til eggedosis. Ta vaniljestanga ut av fløyteblandinga. (Ikkje hiv den! Skyll den og legg den på ein tallerken til tørk. Vi skal lage vaniljesukker av den.)

Kvell fløyteblandinga over eggeblandinga. Visp saman, ha tilbake i kjelen. Og det er no det er om å ha tolmod. Blandinga skal varmast opp, på medium varme medan du rører, til 80 grader. Ikkje meir; då koagulerer egget. Ikkje mindre; då blir ikkje konsistensen på isen så bra. (Eg har med andre ord prøvd begge delar...) Eg finn ut at eg har best kontroll i ein liten tjukkbotna kjele på den minste plata på komfyren. Det brukar å stå i slike oppskrifter at når kremen festar seg på baksida av ei treskei, så er han ferdig. Avkjøl den ferdige vaniljekremen - først i romtemperatur, så i kjøleskap. Kjør deretter i ismaskin.




Velbekomme!

PS. Når eg veit at eg ikkje skal bruke resten av fløyten til noko anna, så brukar eg heile pakken og tilsvarande mindre mjølk.






laurdag 26. desember 2009

Sjokoladeis

(uttales gjerne: chok-la-deis)
2,5 dl fløyte
2,5 dl H-mjølk
100 g sjokolade
20 g kakaopulver
4 eggeplommar
80-100 g sukker

Bland fløyte og mjølk i ein liten tjukkbotna kjele. Hakk sjokoladen, og ha den i kjelen saman med kakaopuveret. Kok opp, rør, pass på at alt er oppløyst. Set til side og avkjøl litt. Visp eggedosis av eggeplommar og sukker. Kvell fløyteblandinga over, bland, og ha alt tilbake i kjelene. Varm over medium varme til det blir ein tjukk eggekrem. Ikkje fall for freistinga til å setje opp varmen meir enn medium. Det skal tjukne gradvis, og det skal ikkje bli for varmt.

Avkjøl; først i romtemperatur, så i kjøleskap. Kjør til iskrem i ismaskin.



Velbekomme!








Iskrem

Jula for to år sia låg det ein iskremmaskin under juletreet. Det har vore til stor glede for slekta. Eg kjem ikkje på så mykje som ikkje smakar betre heimlaga enn det ein kjøper eller lagar av halvfabrikat. Men iskrem som er laga heime, smakar rett og slett noko heilt anna, og mykje mykje betre enn den du kjøper. Nokre (dyre) italienske typar er også veldig gode, det er ikkje det, men det får vi ikkje tak i her i Bø, gjer vi vel?

Iskremmaskina gjer ingenting anna enn å røre rundt medan den frys inn ei røre som du må lage først. Eg har fått nokre spørsmål om det er som ein brødbakemaskin der du har ingrediensane oppi, og så blir det fiks ferdig, men slik er det altså ikkje. Men det er jo innfrysinga som er heile løyndomen med is, så eg synest iskremmaskina er magisk likevel ;-)

Eg veit ikkje om eg kan kalle det ein tradisjon, men det har i alle fall blitt ei ganske uttalt forventning om at vi skal ha minst fem forskjellige typar heimlaga iskrem på nyttårsaften. Og sånn går no romjula... Det er nemleg ein ulempe med iskremmaskina: fryseelementet treng minimum 18 timar i frysaren etter bruk. Eit døgn i praksis. Ein is kvar dag, sånn rundt rekna.



Første året hadde vi vaniljeis, sjokoladeis, kaffeis, jordbærsorbet og blåbæris. I fjor hadde vi vaniljeis, sjokoladeis (ein meir avansert variant enn første året), molteis, mangois - og kva var den siste? Skal tru om det var ein jordbærfløyteis? I år blir det - tja, det blir i alle fall den gode sjokoladeisen, den kjem vi oss ikkje utanom. Vi startar der, og ser korleis det utviklar seg.






Jul! Frokost! Lenge!






fredag 25. desember 2009

Ei juleforteljing

"Han e et fint lys i dag også."









"Ei ørn! 
Ei ørn!"




"Farsken!
Kor e kameraet mett?!"





"Usj. Kjøp nytt objektiv kanskje?"








"Kanskje det, ja. 
Men månen flyg i alle fall ikkje sin vei."

Mjåsundet i går






torsdag 24. desember 2009

God jul :-)








onsdag 23. desember 2009

Småfolk

Endeleg har eg fått helsa på alle nissane. No ventar det kjekkaste eg veit;  vandre rundt i huset og finne plass for kvar enkelt av dei:




Eg seier ikkje god jul riktig endå, men snart... :-)



Konfekt

Konfekt har ikkje vore heilt min greie, og det er strengt tatt meir pirkarbeid enn eg liker. Men i år har eg prøvd meg likevel. Ikkje alt vart like bra, men noko vart skikkeleg godt:

Marsipankuler 
med appelsinmarmelade (ja, den med cognac) 
og sylta ingefær





Tre sortar sjokoladetrøflar
- med pistasjnøtter
- med kaffe og litt lysare sjokolade
- med masse masse masse mørk sjokolade





Troikabitar





Marspiankuler med nougat






Torikabitane skal absolutt gjentakast neste år. Trøflar blir nok også ein gjengangar ;-)





Oppdatering 13:54
Kven kunne vente at det skulle dumpe heimlaga konfekt ned i ein postkasse langt mot nord på lillejulaften? Og enn at det smakar konditortalent (i motsetjing til mine som smakar heimlaga)! Nam! Tusen takk, snille! :-* 








tysdag 22. desember 2009

Julekjeks

120 g romtemperert smør
190 g mørkt muscovadasukker
1 ts riven muskatnøtt
1 ts vaniljesukker
1 stort egg
1 ts natron
150 g sikta sikta kveitemjøl
65 g mandlar, finmalt
85 g kvit sjokolade, grovhakka
125 g mørk sjokolade, grovhakka
75 g hasselnøtter, grovhakka

Pisk smør og sukker godt. (Eg hadde ikkje muscovadasukker, og brukte brunt rørsukker. Det gjekk heilt fint.) Ha i egg, vanilje og muskat og pisk til det blir luftig. Bland mel og natron og rør det inn i deigen saman med mandel. Rør inn sjokolade og nøtter. Set teskeistore toppar med god avstand på eit steikebrett kledd med bakepapir. Steik midt i omnen ved 200 grader i 8 minutt. Avkjøl på rist og oppbevar i tett boks.

Kjeksa blir skikkeleg sprø; lite mjøl, mykje feitt... Denne oppskrifta fann eg i eit nummer av Maison mat og vin. Sia det var eit forsøk, halverte eg oppskrifta. Nokre av kjeksa vart dessverre for mykje steikt (det gjekk fort på slutten, gitt), så det er ikkje meir enn ein smak igjen i ein boks. Men gode vart dei. Masse feitt, masse sukker, masse nøtter og masse sjokolade - dette smakar verkeleg jul ;-)

Velbekomme!






Biscotti med smak av jul

Biscotti er visst i vinden. Eg har laga ein variant av gladkokken Ole Martin Alfsen sine. Oppskrifta fann eg i matbladet Nord, med mi tolking blir det slik:

230 g mandlar
70 g pistasjnøtter
200 g kaldt smør
250 g sukker
500 g sikta kveitemjøl
2 ts vaniljesukker
2 ts bakepulver
1 ts salt
200 g egg (om lag 4 store)
170 g aprikos
100 g tranebær
apsikat
1 eggekvite til pensling

Alfsen brukar sitronskal og rosiner der eg måtte ty til tranebær og apsikat. Eg reduserte sukkermengden med 50 g.

Begynn med å riste mandlar og pistasjnøtter i 15 minutt på 150 grader. Avkjøl heilt.

Bruk ein kjøkkenmaskin. Eg brukte foodprocessor, sia kjøkkenmaskina mi framleis var hos elektrodoktoren, og det var litt heavy for den. Visp saman smør og sukker. Ha i det tørre, bland godt før du har i egga, eitt om gongen. Alfsen presiserer at deigen ikkje må bli for varm, så desse operasjonane skal gå kjapt. Blir det for varmt, set du deigen i kjøleskapet ei stund. Hakk aprikosen i små bitar, og ha frukt og nøtter i røra. (Eg ville nok ha grovhakka nøttene, det gjer oppdelinga lettare.)

Rull deigen til pølser, 6 stk seier Alfsen - eg laga 4. Pensle med eggekvite. Steik nestnedst i omnen, på 170 grader i 25 - 35 minutt. Ta pølsene ut av omnen, avkjøl dei litt, men del dei medan dei endå er varme. Tørk kakebitane på 150 grader så lenge det trengst for at dei skal bli tørre. Eg brukte varmluft sia det fylte to steikebrett.

Avkjøl på rist. Oppbevar i tett boks i romtemperatur.



Det vart godt, og det smakar jul :-)

Velbekomme!







måndag 21. desember 2009

Gammeldags krydderkake

Denne kaka er juletradisjon i heimhuset. Då eg ba om oppskrifta, fekk eg til svar at den kunne eg då finne i den raudruta kokeboka til ho Ingrid. Og jammen ta! Der fann eg den! Eg følgjer oppskrifta til punkt og prikke, bortsett frå at eg reduserer sukkermengden med om lag 1/4:

150 g smør
3 egg
3 dl sukker
1 ss malt kanel
1 ss malt ingefær
1 ss malt nellik
11/2 dl kulturmjølk
1 1/2 dl stivt tyttebærsyltetøy
1 ts natron
4 1/2 dl kveitemjøl (om lag ein halvkilo)

Oppskrifta er passe til ei vanleg brødform. Smelt smør, og avkjøl det litt. Visp egga saman, ha i sukker og visp eggedosis. Bland det tørre, og det ha i røra saman med mjølk, syltetøy og smør. Smør og strø forma, ha gjerne ein strimmel med bakepapir i botnen og opp langs kortkantane. Ha i røra. Steik nedst i omnen, på 175 grader, i 60 - 80 minutt. La kaka bli litt avkjølt i forma før du kvelvar henne på rist. Avkjøl under klede (sweet, Ingrid sine ord).



Eg doblar oppskrifta og steiker to når eg først er i gang. Kaka står seg lenge i kjøleskapet, og eviglenge i frysaren.

Velbekomme!






Honningkake

150 g smør
250 g honning
4 eggeplommar
250 g sukker
1/4 ts malt svart peppar
1/4 ts malt nellik
1/4 ts malt ingefær
1 ts bakepulver
250 g sikta kveitemjøl
1 ss hakka mandlar
4 eggekvitar

Smelt smør, ha i honningen og varm til honningen er flytande. Pisk eggedosis av eggeplommar og sukker (eg reduserte til 175 gram sukker). Bland smøroghonningblandinga i eggedosisen, og rør inn det tørre. Stivpisk eggekvitane og rør dei forsiktig i røra. Smør ei brødform - godt! Ha gjerne ein strimmel med bakepapir i botnen. Steik nedst i omnen på 150 grader i 60 - 80 minutt. Legg over eit bakepapir om kaka blir for mørk. Avkjøl kaka litt i forma før du kvelver henne på rist.

Denne oppskrifta fann eg i Maison Mat og vin (desember 2009).

Velbekomme!










søndag 20. desember 2009

Bøfjerding i julegave?

Det var med litt delte kjensler at eg oppretta ein blogg med namnet "Bøfjerding". Sia eg var lita har Bøfjerding stått i bokhylla, og det kjennest litt utidig å ta namnet.

Bøfjerding er ei årbok med lokalhistorisk innhald frå Bø. I årets bok har to jubilerande menn fått kvar sine artiklar. Mannen fra havet er 15 år, og det er 150 år sia Knut Hamsun vart fødd. Hamsun jobba i to eitt år som lensmansbetjent og eitt år som omgangsskolelærar i Bø - ikkje mange meter frå der Mannen fra havet står i dag. (Utan at det er nokon større samanheng enn som så. Trur eg.) Blant mykje anna er det også ein artikkel om Sjøbruk som han Petter (i (!)) Brenna har skrive.

Boka er å få tak i rundt om på butikkane i Bø, eller ved å kontakte folk i redaksjonen. Fin julegave til bøfjerdingar som har alt, og anna godtfolk :-)







Fjerde søndag i advent

...i morgon snur sola...



det er lov å drømme




Horn - to grovare variantar


Ein held vel på å bli steingammal når pakkane på julekvelden har blitt forbigått av mat på lista over det ein gler seg til. Ribba til ho mor, pinnekjøttet og raspekakene til han far - og alle frokostane med nytina horn og godt pålegg - ah! Eg gler meg til jul, eg :-)

Som eg har vore inne på før, så er det litt utfordrande å skulle forklare oppskrifta til gjærbakst. Men her er likevel eit forsøk på ei oppskrift på horn av ein grovare type:

5 dl kokande vatn
2 dl heilkorn
2 dl sesamfrø og linfrø
7 dl vatn
50 g fersk gjær
2 ss sukker
1 ss salt
4 ss olivenolje
2 dl havregryn
2,5 dl sammalt kveite, grov
1 dl sikta rug
1 dl byggmjøl
15 - 18 dl sikta kveitemjøl

Bland frøa og heilkorn med kokande vatn. La det stå til det blir lunka. Varm vatn til 37 grader og løys opp gjæra. Ha dei to blandingane i saman i ein bolle. Bland i olje, sukker og salt. Elt først inn alt det grove mjølet, elt så inn kveitemjølet til passe deig. Hev under plast på ein lun stad til dobbel storleik. Slå ned og hev opp igjen. Bak ut horn. Penske med egg og strø over gresskarkjernar. Steik på 230 - 250 grader, midt i omnen, i 8 - 15 minutt avhengig av omn og storleik. Avkjøl på rist.



Ein annan variant er denne:
Smelt 100 g smør, ha i 1 l mjølk og varm til 37 grader. (Det går sjølvsagt an å bruke vatn og olje for ein magrare variant, men deigar med mjølk og smør er smidiagre og lettare å halde på med.) Ha i ein bolle og løys opp 50 g fersk gjær. Bland i 1 ss salt og 2 ss sukker. Ha i litt sesamfrø, linfrø, solsikkekjernar... Ha i litt heilkorn og litt havregryn... Fyll på med byggmjøl, litt rugmjøl,  og litt sammalt kveite. Elt inn kveitemjøl til passe deig... Eg veit, dette er inga oppskrift. Men det er slik eg vanlegvis gjer det - på gefühlen utan mål. Av og til held eg meg til kostholdsråda om halvt om halvt med fint og grovt mjøl, andre gonger tenkjer eg skitt au - horn er ikkje kvardagsmat så uansett.

Velbekomme!






laurdag 19. desember 2009

Dei aller beste smultringane...


...er det ho Mamma som lagar!



Eg får steike: